ਬੈਂਕ ਗਾਰਡ ਦੀ ਗੋਲੀ ਲੱਗਣ ਨਾਲ ਮੌਤ, ਬੰਦੂਕ ਸਾਫ਼ ਕਰਦੇ ਸਮੇਂ ਵਾਪਰਿਆ ਹਾਦਸਾ

ਗੁਰਾਇਆ:
ਨਜ਼ਦੀਕੀ ਪਿੰਡ ਰੁੜਕਾ ਕਲਾਂ ’ਚ ਇੱਕ ਦਰਦਨਾਕ ਘਟਨਾ ਵਾਪਰੀ, ਜਿੱਥੇ ਬੈਂਕ ਗਾਰਡ ਅਨੂਪ ਸੰਘੇੜਾ ਦੀ ਆਪਣੀ ਹੀ ਬੰਦੂਕ ਦੀ ਗੋਲੀ ਲੱਗਣ ਨਾਲ ਮੌਤ ਹੋ ਗਈ।

ਮ੍ਰਿਤਕ ਦੀ ਪਛਾਣ 34 ਸਾਲਾ ਅਨੂਪ ਸੰਘੇੜਾ ਪੁੱਤਰ ਦਵਿੰਦਰ ਸਿੰਘ ਵਜੋਂ ਹੋਈ ਹੈ। ਉਹ ਪਿੰਡ ਪੱਟੀ ਬੁਲਾ ਦਾ ਰਹਿਣ ਵਾਲਾ ਸੀ ਤੇ ਗੁਰਾਇਆ ਸਹਿਕਾਰੀ ਸੁਸਾਇਟੀ ਬੈਂਕ ’ਚ ਗਾਰਡ ਵਜੋਂ ਨੌਕਰੀ ਕਰਦਾ ਸੀ।

ਛੁੱਟੀ ਦੇ ਦਿਨ ਘਰ ਲੈ ਆਇਆ ਸੀ ਬੰਦੂਕ

ਸਾਬਕਾ ਸਰਪੰਚ ਕੁਲਵੰਤ ਸਿੰਘ ਸੰਧੂ ਨੇ ਦੱਸਿਆ ਕਿ ਅਨੂਪ ਛੁੱਟੀ ਵਾਲੇ ਦਿਨ ਆਪਣੀ ਲਾਇਸੈਂਸੀ ਡਬਲ ਬੈਰਲ ਬੰਦੂਕ ਘਰ ਲੈ ਆਇਆ ਸੀ। ਸ਼ਨੀਵਾਰ ਅਤੇ ਐਤਵਾਰ ਦੀ ਛੁੱਟੀ ਕਰਕੇ ਉਹ ਆਪਣੇ ਘਰ ਰੁੜਕਾ ਕਲਾਂ ਆਇਆ ਹੋਇਆ ਸੀ। ਬੰਦੂਕ ਸਾਫ ਕਰਦਿਆਂ ਅਚਾਨਕ ਗੋਲੀ ਚੱਲ ਗਈ, ਜੋ ਉਸਦੇ ਸਿਰ ‘ਚ ਅੱਖ ਦੇ ਨੇੜੇ ਲੱਗੀ। ਥਾਂ ‘ਤੇ ਹੀ ਉਸਦੀ ਮੌਤ ਹੋ ਗਈ।

ਘਰ ’ਚ ਇਕੱਲਾ ਸੀ ਅਨੂਪ

ਜਾਣਕਾਰੀ ਮੁਤਾਬਕ, ਅਨੂਪ ਦੀ ਪਤਨੀ ਛੇ-ਸੱਤ ਮਹੀਨੇ ਪਹਿਲਾਂ ਦੁਬਈ ਗਈ ਹੋਈ ਹੈ। ਉਸਦਾ ਪੁੱਤਰ 8-9 ਸਾਲਾਂ ਦਾ ਹੈ ਤੇ ਘਰ ’ਚ ਸੀ। ਪਿਤਾ ਵੀ ਉਥੇ ਮੌਜੂਦ ਨਹੀਂ ਸੀ। ਮੌਕੇ ਤੇ ਅਨੂਪ ਇਕੱਲਾ ਹੀ ਸੀ।

ਪੁਲਿਸ ਨੇ ਬੰਦੂਕ ਕਬਜ਼ੇ ‘ਚ ਲੈ ਲੀ

ਜਿਵੇਂ ਹੀ ਹਾਦਸੇ ਦੀ ਖਬਰ ਮਿਲੀ, ਐਸਐਚਓ ਗੁਰਾਇਆ ਸਿਕੰਦਰ ਸਿੰਘ ਵਿਰਕ ਦੀ ਅਗਵਾਈ ਹੇਠ ਚੌਕੀ ਇੰਚਾਰਜ ਅਮਨਦੀਪ ਸਿੰਘ ਤੇ ਪੁਲਿਸ ਟੀਮ ਮੌਕੇ ‘ਤੇ ਪਹੁੰਚੀ। ਉਨ੍ਹਾਂ ਦੱਸਿਆ ਕਿ ਮੌਕੇ ‘ਤੇ ਲਾਸ਼ ਮਿਲੀ, ਬੰਦੂਕ ਕਬਜ਼ੇ ‘ਚ ਲੈ ਲਈ ਗਈ ਹੈ।

ਧਾਰਾ 174 ਹੇਠ ਕਾਰਵਾਈ, ਲਾਸ਼ ਭੇਜੀ ਗਈ ਫਿਲੌਰ ਹਸਪਤਾਲ

ਪੁਲਿਸ ਨੇ ਪਰਿਵਾਰਕ ਬਿਆਨਾਂ ਦੇ ਆਧਾਰ ‘ਤੇ ਧਾਰਾ 174 ਹੇਠ ਕਾਰਵਾਈ ਕਰਦਿਆਂ ਲਾਸ਼ ਸਿਵਲ ਹਸਪਤਾਲ ਫਿਲੌਰ ਭੇਜ ਦਿੱਤੀ ਹੈ। ਮਾਮਲੇ ਦੀ ਜਾਂਚ ਜਾਰੀ ਹੈ।

ਪਿੰਡ ’ਚ ਸੋਗ ਦੀ ਲਹਿਰ ਫੈਲ ਗਈ ਹੈ।